Oihaneder Euskararen Etxeak eskaintza kultural anitza eskainiko du urte berriarekin batera

Gaurtik eta martxoaren 31ra arte, mota askotako jarduerak antolatuko dira publiko ezberdina euskal kulturara erakartzeko asmoz: kontzertuak, antzezlanak, ikastaroak, erakusketak, lehiaketak, aurkezpenak, ikuskizunak, filmak, deialdiak…

2022. urtean sartzearekin batera, Gasteizko Oihaneder Euskararen Etxeak urtaro berriko egitaraua aurkeztu du. Aurreko urtaroetan bezala, Oihanederrek ekitaldi ezberdin eta ugariz osatutako kultur proposamenak eskainiko ditu oraingoan ere.

Gaurtik eta martxoaren 31ra arte, mota askotako jarduerak antolatuko dira publiko ezberdina euskal kulturara erakartzeko asmoz: kontzertuak, antzezlanak, ikastaroak, erakusketak, lehiaketak, aurkezpenak, ikuskizunak, filmak, deialdiak…

Gaur emango zaio hasiera denboraldi berri honi: Michael Haneke zuzendariaren Happy end filma ikusteko aukera izango dute kulturzaleek (jatorrizko hizkuntzan, frantsesez eta ingeleraz, euskaraz azpititulatua). Aste honetan ere, Hezi-Ola ikastaroari amaiera emango zaio azken solasaldiarekin: Aisialdia, hiri hezitzailearen oinarri.

Euskararen Etxeak azaldu duenez, Oihanederren webgunea eguneratuta egongo da behin betiko informazioarekin, “gaur egun bizi dugun egoerak sortzen dituen azken orduko egokitzapenak bertan eguneratuko dira. Aldi berean, jarduera bakoitzaren informazio xeheagoa data heldu ahala jakinaraziko da”.

Neguko programazioko jarduerak doakoak izanik ere (Hezi-Ola ez beste guztiak), gonbidapena aldez aurreetik eskuratu beharko da ohiko moduak erabilita: oihaneder@oihaneder.eus helbidera idatzita, telefonoz eskatuta edota Bibe plataformaren bidez eskuratuta. Salbuespenak salbuespen, astebeteko aurrerapenaz jarriko dira gonbidapenak eskuragarri.