Ikasle Goizetik Gazte Eztandara, transmisioak ez du etenik Durangon

Ikasle Goiza euskal kulturaren transmisioa lantzeko helburuz antolatzen da aspalditik.

59. Durangoko Azoka indartsu hasi da. Ikasle Goizarekin zabaldu ditu ateak, eta haur eta gazteek goraino bete dituzte Landako guneko kaleak zein azokaren gainerako guneak. 1.300 ikasletik gora etorri dira Euskal Herriko hamaika txokotik, euskal kulturaren plazan murgiltzeko asmoz.

Ikasleentzako tailerrak egon dira gunez gune: leloak sortzeko lantegia Ahotsenean, bideoklipak ekoizteko tailerra Irudienean, antzerki inprobisaziokoa Szenatokian, collagea Saguganbaran, Gamer Gela Kabian, Basterretxearen obran inspiraturiko diseinu sorkuntza Museoan… hainbat aukera izan dituzte.

Ikasle Goiza euskal kulturaren transmisioa lantzeko helburuz antolatzen da aspalditik. Antolatzaileen esanetan, “aurten ere, kultura bizi, ikusi, sentitu, hartu eta emateko goiza izan dute. Gainera, gogoko dituzten hainbat sortzailerekin aurrez aurre egon dira erakusmahaietan ere”.

Gazte Eztanda

Biharko jardunaldia ere transmisioari zuzenki loturik egongo da Durangoko Azokan, Gazte Eztandaren hirugarren edizioa ospatuko baita. Egunean zehar haiei begirako makina bat ekitaldi egongo dira, eta gaueko 22:00etan kontzertuak ere bai Landako plazako karpan: Naxker, Nekktar eta Xaukena Xauken eskutik.

Horrez gainera, iazko Sormen Bekaren emaitza aurkeztuko dute Marramiau kolektibokoek 11:30ean Saguganbaran. Argizagi, zubiak adiskidetasunerantz izeneko telesaila estreinatuko dute eta Euskaraldiak Bulego taldeak laugarren ediziorako sortu duen kanta aurkeztuko du.