Iruñeko 9 ikastetxe publikotako 25 taldek ‘Bertsolaritza irakaskuntzan’ programan parte hartuko dute

Lehen Hezkuntzako 5. eta 6. mailetako ikasleek ordubeteko 15 saio izango dituzte talde bakoitzeko, 2025eko ekainera arte.

Bertsolaritza Irakaskuntzan programaren edizio berri bat abiatu du Iruñeko Udalak 2024-2025 ikasturterako. Nafarroako Bertsozale Elkartea arduratuko da programaz, 44.278,40 euroren truke. Horrela, Udalak babesten jarraituko du dagoeneko finkatuta dagoen eta duela hogeita hamar urte baino gehiagotik D eredua eskaintzen duten Iruñeko ikastetxe publikoen hezkuntza-eskaintza osatzen duen programa hori.

Denera bederatzi ikastetxe publikotako 35 taldek parte hartuko dute aurtengo programan: Hegoalde Ikastola HLHIP, Bernart Etxepare IP, San Francisco HLHIP, Buztintxuri IP, Sanduzelai, Patxi Larrainzar HLHIP, CEIP Mendigoiti HLHIP, Elorri eta Amaiur Ikastola HLHIP.

“D eredua eskaintzen duten eta parte hartzeko eskaera egiten duten Iruñeko ikastetxe publikoetako Lehen Hezkuntzako 5. eta 6. mailetako talde guztiek eskola-programa osoa jasoko dutela bermatzea da helburua: 15 eskola-ordu taldeko, ordubeteko 15 saiotan banatuta”, zehaztu dute.

Lehen mailako baliabide didaktikoa

Udalaren arabera, “bertsolaritza lehen mailako baliabide didaktikoa da hizkuntzaren erabilera testuinguru ez-formaletan sustatzeari begira, eta hezkuntza-sistemaren curriculum ofizialaren jarduera osagarri gisa taxutzen da, ikasle horien ikaskuntzari beste balio bat erantsiz.
Hitzekin eta ideiekin jolastuz bertsoak inprobisatzeko jarduerak hizkuntzaren erabilera sustatzen du, testuinguru ludiko batean betiere, eta ikasleen buru-trebetasuna indartzen du”.

Hala, saioak bertsolaritzaren oinarrizko nozioak ikastera bideratzen dira (historia, doinuak, metrika, errimak…), eta teknikaren irakaskuntzan jartzen da azpimarra, jolasen eta ariketen bidez. “Testuingurua ludikoa izaten da beti, eta hizkuntzaren erabileran sakontzen da, hizkuntza- eta komunikazio-gaitasunak ardatz harturik”.