Igartubeitik, Saint-Laryko Turismo Bulegoak eta Ayerbeko Udalak ‘Jakintzen Hibridazioa’ zikloa abiatu dute

Tokiko eragileek eskainitako tailerren zikloa da. Lehenengo hitzordua martxoaren 28an izango da, ostirala, Igartubeiti Baserri Museoan, Jateko aukeratzen dugunaren aztarna merienda-tertuliarekin.

Ezkio-Itsasoko Igartubeiti Baserri Museoak, Saint-Laryko Turismo Bulegoak eta Ayerbeko Udalak Poctefa Patrim 4.0 proiektuaren Jakintzen Hibridazioa ekimena jarri dute abian. Azaldu dutenez, “lanbide tradizionalei eta horiek mundu garaikidean duten iraupenari buruzko hausnarketa- eta ikaskuntza-espazioak sortzea helburu duen tailerren zikloa da”. Hala, ziklo honetan herritarrei irekitako saioak izango dira eta bertako artisau, artista eta nekazariek eskainiko dituzte, hainbat gairi buruz: saskigintza, zeramika, elikadura, ehun-diseinua, artea, dantza, erlezaintza, bitxigintza eta natura. Gainera, topaketak antolatuko dira, komunitateen etorkizunean balioak, identitateak, memoria eta kultura transmititzeak duen zereginari buruz eztabaidatzeko.

Ziklo honetako lehen tailerra Jateko aukeratzen dugunaren aztarna merienda-tertulia izango da, Biziola bertako nekazarien kooperatibarekin batera, martxoaren 28an, ostirala, Igartubeitin. Topaketa honetan, parte-hartzaileek tokiko produktuak dastatu ahal izango dituzte eta elikagai-erabakiek ingurumenean, tokiko ekonomian, gizartean eta kulturan duten eraginari buruz hausnartu ahal izango dute.

Bertaratu nahi dutenek izena emateko epea zabalik dute jada: igartubeiti@gipuzkoa.eus helbidera idatzita, whatsapp bidez 618 00 41 31ra mezu bat idatzita, 943 72 29 78 telefono zenbakira deituta.

2025ean zehar, Igartubeitiko lehen hitzordu honen ondoren, jarduera gehiago egingo dira Saint-Laryn, ondoren urrian Ayerbera joateko. Azkenik, Igartubeitin azaroan egingo diren tailerrekin itxiko da egitaraua. Programazio ibiltari honek lurraldeen arteko lankidetza-espiritua eta jakintza tradizionalen transmisioarekiko konpromisoa islatzen ditu.