Harizko instrumentista gazteak prestatzeko Nicanor Zabaleta beka martxan da Gipuzkoan

Eskabideak aurkezteko epea maiatzaren 16ra arte egongo da irekita. Beka 16.400 eurokoa izango da, eta 26 urtetik beherako gazteei zuzenduta dago.

Gipuzkoako Foru Aldundiko Kultura, Lankidetza, Gazteria eta Kirol Departamentuak “Nicanor Zabaleta” bekaren deialdia onetsi du, hari-instrumentistei prestakuntza espezializatua izateko aukera emateko asmoz. Beka 2024-2027 aldirako Beken Plan Estrategikoaren parte da, eta musikari gazteen garapena sustatzea du helburu, biolin, biola, biolontxelo, harpa edo kontrabaxuko interprete bakarlari gisa espezializatzeko.

Beka, gehienez, 14.000 eurokoa izango da, eta 26 urtetik beherako gazteei zuzenduta egongo dago. Diru-laguntza eskatzeko baldintzen artean, besteak beste, Hego Euskal Herrian bizitzea, kontserbatorioko goi mailako titulua edukitzea edo aparteko talentua izatea tresna horietako batean eskatzen da.

Isaac Palencia Kultura Sustapena eta Gazteriako zuzendariak adierazi duenez, “Nicanor Zabaleta bekaren helburua da harpa-jotzaile handi horren memoria ohoratzea eta gure lurraldeko talentudun gazteak mailarik gorenera irits daitezen bultzatzea, bikaintasuneko prestakuntza izateko bitartekoak jarriz eta musika klasikoaren eremuan haien profesionalizazioa sustatuz”.

Eskabideak aurkezteko epea maiatzaren 16an amaituko da. Eskabideak telematikoki aurkeztu ahal izango dira, Gipuzkoako Foru Aldundiaren egoitza elektronikoaren bidez, edo, bestela, erakundearen Erregistro Nagusian, aurrez aurre.