Artium Museoak ‘Lotura mekanikoak. Praktika performatiboak museoan’ performance zikloaren hirugarren edizioa aurkeztu du

Lotura mekanikoak programak espazioak aktibatzeko aukerak aztertzen jarraitzen du, ahots ugarirekin enuntziazio-leku berezietatik performancea jorratzen duten artisten lanaren bidez.

Gasteizko Artium Museoak Lotura mekanikoak. Praktika performatiboak museoan performance zikloaren hirugarren edizioa antolatu du. Programa honek praktika artistikoa espazioarekin eta espazioan sortzen diren harremanekin artikulatzeko modu desberdinak aurkezten ditu, baita hura nahasteko, iraultzeko edo birpentsatzeko duen potentziala erakutsi ere. Ekimenak hamaika artista eta kolektiboren praktika anitzak ekarriko ditu lehen lerrora, urriaren 17an eta 18an. Performance saioetarako sarrera librea izango da, edukiera mugatuarekin. Gainera, asteburuan museorako sarrera doakoa izango da programa dela eta.

Programaren hirugarren edizioak performance multzo bat proposatzen du, non ahotsa enuntziazio-tresna gisa ez ezik, gorputzak zeharkatzen eta aldatzen dituen bibrazio-tresna gisa ere ulertzen den, bai performatzen dutenena, bai entzuten dutenena. Museoko espazioetan bizi diren ekintza horiek aukera ematen dute entzute kolektiborako eta ikusmin aktiborako, askotan arkitekturarekin edo ikusgai dauden erakusketekin solasean.

Horrela, elkarrekin egoteko moduak birpentsatzeko gailu bihurtzen da zikloa, denbora eta espazioa partekatzeko moduak birpentsatzeko gailua, era askotara erabilitako ahotsaren presentziatik, erresonantziatik eta materialtasunetik abiatuta. Erakusketa programa bat baino gehiago, esperimentazio sentikorreko eremu gisa finkatzen da Lotura mekanikoak, non performance bakoitza ez baita soilik museoan txertatzen. Aitzitik, une batez, beste leku bat bihurtzen du museoa.