[Bideoa] Kritika soziala alde batera utzi eta irakurlea dibertitzea nahi izan du Jon Arretxek bere azken eleberriarekin

Txerriak eta loreak da nobelaren izenburua eta umore beltz askorekin datorrela aurreratu du idazleak.

Azken urteotan Toureren sagan zentratuta egon ondoren, guztiz bestelako nobela beltza dakarkigu oraingo honetan Jon Arretxe idazlea. Hiri handietako lunpen guneak alde batera utzita, egileak fabulatu duen trama berria bera bizi izandako hiru herrietan garatuko da: Basaurin, Gasteizen eta Arbizun. Eta etorkin, etxegabe, prostituta edo bestelako biztanle zaurgarrien ordez, negozio aitorrezinetan diharduten bertoko aberats mafiosoak hartuko dute protagonismoa.

Arbizuko hestebete-lantegi batean gertatzen den txistor lapurreta misteriotsua da liburuaren abiapuntua, eta hortik aurrera umorez idatzitako trama beltza dator, oso beltza, erritmo bizikoa, elkarrizketa ugarikoa, “tarantinoar” estetikakoa.

Arretxeren esanetan, “lehenengo orrialdetik jada hildako batzuk daude, orokorrean hiltzaile asko daude nobela honetan, orrialde bakoitzeko inoiz baino gehiago”. Erritmo handiko trama dela ere aipatu du egileak eta “irakurlea harritzeko, ustekabez ondo hornitzen saiatu naiz”.

Erein argitaletxearen esanetan, “Txerriak eta loreak ezohiko nobela da, laburra eta pertsonaia bereziz hornitua”: Zuriñe Ruiz de Gordoa gasteiztar mandatugile berezia da eleberri honetako protagonista. Honekin batera, Gabriel Abrisketa basauriar enpresari ustela edota Fermin Bakaikoa arbizuar txistorgile iluna ere ageri dira.