Eako Poesia Egunek ez dute jarraipenik izango

Eako Poesia Egunetako antolatzaileek sare sozialen bidez zabaldu dutenez, uztailean antolatzen ohi dituzten jardunaldiek ez dute jarraipenik izango, aurten beraz, ez da hamaseigarren ediziorik egongo Bizkaiko Kostaldeko herri honetan. Ziklo baten amaiera dela sentitzen dutelako, gelditu beharra dutela adierazi dute ohar baten bidez, “pausatu, eraldatzeko gaitasuna ez agortzeko, berritzaile izateak haustura dakarrelako, garai berriek modu berriak eta gogo berriak eskatzen dituztelako, hutsunea eta zuloa sentitzeko eta sentiarazteko, euskaraz sortutako eta euskarara ekarritako kulturan sinesten dugulako, literatur plazan konfiantza osoa dugulako, mila adierazpidetan berreraikiko dela badakigulako, kultura ez delako kudeaketa hutsa, kultura etengabeko mugimenduan bizi delako”.

Haria eten, bide berriak josteko

Eak Gabriel Aresti idazlearekin zeukan zorra kitatzeko asmoz, 2004an omenaldi bat antolatu zuen. Hurrengo urteetan, poesia zaletasuna eta ekimenarekin jarraitzeko gogoa ikusita, hasieran Arestiren omenezko eguna zena, asteburu beteko poesia ekimen bihurtu zen, horrela sortu ziren Eako Poesia Egunak.

Antolatzaileek gelditzeko beharra sentitu duten arren, “zulo beltzaren gainean salto egin, eta zuritasun lauari aurre egiteko energia” oraindik badutela adierazi dute. “Hamabost urteotan zehar jositako haria eten, eta beste hari bati jarraitzeko intuizioa eta gogoa jaio zaizkigu eta laster helduko diogu hari berri horri. Hari zaharra eten behar, tenk, eta minez bada ere, agur esan behar diegu Eako Poesia Egunei. Minez, baina pozarren, ibilbide luze honetan ikasitakoagatik, eta utzitako arrastoagatik. Minez, baina gogoz, gorputzak atsedena eskatzen digulako, eta buruak egitasmo berrietan arakatzeko gogoa”.