‘Hiru Hari Hori’ erakusketa ikusgai Iruñeko Ziudadelako labean

Sandra Arroniz, Maitane Azparren eta Berta Oses Suarez Beruta artisten diziplina anitzeko lan kontzeptuala otsailaren 16ra arte egongo da ikusgai.

Sandra Arroniz, Maitane Azparren eta Berta Oses Suarez Beruta artistek osatutako Hiru Hari Hori erakusketa paratu dute Iruñeko Ziudadelako labean, otsailaren 16ra arte. Azaldu dutenez, “denborari soilik eman dakioke puntada bat”. Sortzaile hauek espresio kode komuna erabiltzen dute: orratza.

Proposamen artistiko honetan, bakoitzaren ikuspuntutik abiatuta, ehungintzaren lengoaia ezberdinak aztertzen dituzte, denbora argumentu-hari gisa hartuta. Puntadatik puntadara, brodatuek, trokelatuek, korapiloek, mugimendu errepikakor eta pausatuez, denbora bakarra eta errepikaezina sortzen dute, edo ez. Sortzaile bakoitzak orainaren eta iraganaren ikuspuntua erakusten dute. Etorkizun komun batera bideratzen gaituzten denboraren hariak.

“Batzuetan denbora bizkortu egiten da, beste batzuetan aldiz, moteldu oraina, iragana eta etorkizuna elkartzen diren erritu-leku honetan”. Tantaka batek erritmoa markatzen du. Energia-zurrunbiloak espazioak eskaintzen zirkulatzeko aukera indartzen du. Erdigune horren inguruan hiru denbora-lerro pertsonal agertzen dira.

Hasiera batean, hiru arauak patuaren tapizak ehuntzen ari ziren, pertsonen bizitza harilkatzen, haien hariaren luzeraren arabera. “Hiru denbora, hiru arau, hiru hari, elkar lotzen dira etorkizun bateratu bat osatu arte”.

Masa beltz bat, ia argi guztia xurgatzen duena. Pertza bat, sagar bat, zulo beltz bat, orakulu bat, desioen putzu bat; aurpegi ugari dituen putzu poliedriko bat. Sakontasun beltz bat, bizia duena. Urak markatzen du denbora. Tantak gure denbora lerroetatik putzua betetzen doaz, gure izatearen ondorio dira.

Tolesturen bidez, sei eskuetara sortutako ehungintzako pieza bakarra dugu. “Elkarlana bizi-iturri gisa”.