Euskara hobetzeko hezkuntza estilo liburu berria aurkeztu dute

IKAS euskal pedagogia zentroak aurkeztutako tresnak euskaraz egin ohi diren hutsez ohartu eta horiek zuzentzeko baliabideak eskaintzea du helburu. Webgunean edota aplikazio bidez erabili daiteke.

Dudaken jarri diote izena euskara hobetzeko hezkuntza estilo liburu berriari. IKAS euskal pedagogia zentroak sortutako tresna digital hau gramatika saileko hainbat zalantza argitzea du helburu, hala nola: bere/haren, edo/ala, zer/zein nola erabil, etab. Halaber, euskararen ahoskeran edota laburduren eta sinboloen idazketan lagundu nahi du, “gaien arabera, fitxari behatzea aski da, baina beste batzuetan formakuntza beharrezkoa da”, argitu dute. Horretarako,  formakuntza saioak ere antolatuko dituztela iragarri dute.

Proiektuaren sustatzaileek azaldu dutenez, “tresna digitalak ematen dituen gomendioak balio dute IKASen kontu ari diren idazleentzat, argitaletxeetako langileentzat, itzultzaileentzat eta zuzentzaileentzat, eta berdin euskara hobetu nahi duten euskaldun ororentzat, izan irakasle ala ikasle”. Dudaken webgunean eta aplikazio bidez erabili daiteke.

Proiektu honen sortzaileek iragarri dutenez, estilo liburua osatuz joango da, Nolaerran itzultzailearekin, Euskaltzaindiaren baliabideekin eta Berriaren estilo liburuarekin lotura eginez, besteak beste.

IkAS zentroko Aines Dufau izan da proiektuaz arduratu dena eta, berarekin batera, edukiak lantzen Beñat Oihartzabal euskaltzaina, Maia Duguine Iker zentroko kidea, Celine Mounole UPPAko irakaslea, Antton Luku euskara irakasle ohia eta IKASeko Ixabel Erremundegi aritu dira. Jean-Michel Lasausa berriz, ilustrazioez arduratu da.