Nazioarteko Dantzaren Egunean sareak dantzan

ADDE Euskal Herriko Dantza Profesionalen Elkarteak #dantzaeguna traolarekin, dantzari buruzko aipamen bat sareetan partekatzera gonbidatu nahi dute jendea.

Koronabirusaren krisiaren eraginez, asko dira bertan behera utzi edo atzeratu behar izan dituzten kultura ekimenak. Dena moldatu beharra dago, egun dugun ezohiko egoerara egokitu. Gaur Nazioarteko Dantzaren Eguna dugu eta honetan ere bada aldaketa. Sare sozialek aretoen lekua hartu dute eta dantzaz betetzen ari dira. Halaxe nahi izan du ADDE Euskal Herriko Dantza Profesionalen Elkarteak, #dantzaeguna traolarekin, dantzaren aipamen bat sareetan partekatzera gonbidatu nahi dute jendea, egun honetan ikusgai izan dadin: koreografia bat, argazkiak, hitzak, norbaitekin partekatutako uneak. “Guztiak gonbidatu nahi ditugu! Lagun, senide, lankide eta lagunak gonbidatzera animatzen zaituztegu, sareak dantzaz bete ditzagun”.

Izan ere, ADDErentzat “dantza lanbidea da, baina orain inoiz baino gehiago dantza osasuna, ongizatea, lotura, komunikazioa da, eta mezu horrek sareak betetzea eta egun honetan gurekin egotea nahi dugu. Mugimendua geldiezina da, bizitza bera den bezala”.

Gaurko ekimenak pasa den astean du sorburua. “Etxean gaude, azken asteak leku berri batetik bizi ditugu harremanak, ohiturak, bizitza. Gure gorputzek eta adimenek mugimenduan jarraitzen dute, gure taupaden pultsuari jarraituz, taupadak beste askoren taupadetara egokitzen direlarik”, adierazi zuen ADDEk bere webgunean. “Behatzeko, entzuteko, baloratzeko, faltan botatzeko, errespetatzeko, adierazteko, ulertzeko eta ulertzeko” unea zela ikusita, elkarteak gogoeta egiteko aukera zabaldu zuen sare sozialen bidez, Dantzaren Nazioarteko Eguna baliatuz. Hala, zazpi gogoeta, zazpi ikuspuntu partekatu dituzte azken zazpi egunetan, ADDEko zuzendaritza-batzordeko kide bakoitzaren ikuspegitik.