Edukiak euskaraz emititu ditzala eskatu diote Netflix plataformari

Change.org webgunearen bidez sinadura bilketa abiatu dute ikus-entzunezko sareari edukiak euskaraz emititu ditzan eskatzeko. “Euskara eta plataforma honen kontsumitzaile potentzial diren 800.000 euskal hiztunak kontuan hartu gabe iritsi zen Netflix Euskal Herrira”.

Netflix ikus-entzunezko plataforma 2014an iritsi zen Lapurdira, Nafarroa Beherera eta Zuberoara. 2015ean, berriz, Hego Euskal Herrira heldu zen, eta gaur egun munduko Internet bidezko telebista hornitzaile handiena bilakatu da. “Euskara eta plataforma honen kontsumitzaile potentzial diren 800.000 euskal hiztunak kontuan hartu gabe iritsi zen Euskal Herrira”, adierazi dute sinadura bilketa abiatu dutenek.

“Hasiera hasieratik, Netflix gaztelaniaz eta ingelesez osaturiko serie eta filmen katalogo batekin agertu zen Estatu espainiarreko ikus-entzunezko merkatuan; merkatu frantziarrean ere modu bertsuan egin zuen: telesail eta filmak frantsesez eta ingelesez eskainita”, azaldu dute.

Euskal hiztunak ez dira plataformari edukiak euren hizkuntzan emititu ditzan eskatu dioten bakarrak, beste hizkuntza gutxitu batzuetako norbanako, kolektibo eta eragileek ere eskatu dute. Plataformak, bere aldetik, edozein hizkuntzetan benetako eskaria egonez gero, edukiak hizkuntza horretan eskainiko lituzkela adierazi du.

Hortaz, sinadura bilketa abiatu dute sarean, change.org webgunean. “Netflix-i zera adierazi nahi diogu: euskal hiztunok plataformako ikus-entzunezko eduki denak euskaraz jaso nahi ditugula”.