Bertso Udalekuetarako prestaketa lanetan hasi dira

Oraindik ez dakite udalekuak egin ahal izango diren, baina lanak aurreratzen hasi dira Bertsozalekoak. Martxoaren 1ean hasiko da hezitzaileen izen-ematea; haurrena, berriz, ez dute oraindik abiatuko.

Bertsozale Elkarteak adierazi duenez, “egoeraren bilakaerak erakutsiko digu aurten Bertso Udalekuak egingo ditugun ala ez”. Maiatzaren hasieran hartuko dute erabakia, une horretan indarrean egongo diren neurri eta legeak aintzat hartuta. Edonola ere, udalekuek aurrelan handia eskatzen dutela diote, aintzat hartu beharreko ezohiko neurriak ere gehituko zaizkie aurten, eta ondorioz, prestaketa lanetan hasiak dira.

Haurren izen-ematea ez dute oraindik abiatuko, udalekuak egingo direla ziur jakin arte; maiatzean izango da hori, eta orduan abiatuko lukete haurren izen-ematea. Hezitzaileenari ekingo diote, ordea. “Martxoaren 1ean hasiko dugu hezitzaileen izen-ematea, 10:00etan; www.bertsozale.eus atarian izango den izen-emate orria bete beharko da horretarako”. Hezitzaileek begirale, zuzendari, sukaldari ala praktiketako begirale gisa eman ahal izango dute izena, ondoen egokitzen zaien udalekuetako txanda ere aukeratuta. Martxoaren 14an amaituko da epea, eta apirilaren hasieran emango zaie beren izen-ematearen egoeraren berri.

Apirilean lantaldearen osaketaren berri emanda, maiatzaren hasieran jakinaraziko zaie hezitzaileei udalekuak egingo ote dituzten ala ez, eta maiatzaren 22an izango litzateke prestaketa saio edo egun-pasa.

Zortzi txandako udalekuak

Bost txanda egin ohi dituzte, baina aurtengoan lagun eta egun kopuru gutxiagoko egonaldiak antolatu dituzte; horregatik, zortzi txanda dira. Sopelan eta Zuhatzan txanda bana egingo lukete, eta Orion, Uitzin eta Amaiurren, bina. Guztiak bost egunekoak dira eta uztailean izango lirateke. Txanden inguruko informazio gehiago, hemen.