‘Erdian Erein’ lelopean egingo da datorren urteko Nafarroa Oinez jaia, Tafallan

Tafallako ikastolak baliabideak behar ditu eraldaketa pedagogikoko prozesua finkatu ahal izateko. Prozesu hori dagoeneko fruituak ematen ari da, baina espazio eta ikasgelen banaketarako behar berriak sortu ditu.

Datorren urteko Nafarroa Oinez jaia aurkeztu dute, gaur, Erdian Erein lelopean. Urriaren 16an egingo da Nafarroako ikastolen aldeko jaia Tafallan eta aukeratutako leloarekin, ikastola antolatzaileak eskualdean euskararen erabilera eta presentzia sendotu nahi ditu. Aritz Azkarate lehendakariak azaldu duen bezala, “gure seme-alabek euskaraz jolasteko, ikasteko, lan egiteko eta ametsak gauzatzeko aukera izan dezaten. Eta egin dezatela benetan gainerakoekiko baldintza berdinetan, eta hori eguneroko borroka bihurtu gabe”.

Nafarroako Ikastolen Elkartearen Iruñeko egoitzan egin den ekitaldian datorren Nafarroa Oinezen logotipoa ere aurkeztu dute. Arte-ezkur bat laranja eta berdeen artean, Nafarroako landaren koloreak. Irudi horren bitartez, Tafallako Ikastolako zuzendari Paula Arregiren arabera, txikia den zerbait erraldoi bilakatu daitekeela adierazi nahi da.

Logotipoa Tafallako Oinez Basoari egindako keinua ere bada. 2011ko Nafarroa Oinezen inguruan sortutako proiektua da, eta ezkur txikien ereite kolektibotik abiatuta, milaka zuhaitz landatzea ahalbidetu du.

Berrogeita hamar urteko historia

Arte horiek bezala, Garces de los Fayos Ikastola ere hazi egin da proiektu gisa.

Zortzi familiaren borondatetik sortu zen eta pixkanaka sendotzen joan da, eta mende erditik gora darama horrela. “Lehen urteak gogorrak izan ziren”, adierazi du Arregik, “baina gaur egun gure eremuaren euskalduntzean erreferentziazko zentroa gara”.

Hala ere, oraindik badaude erantzun beharreko arazo eta beharrak. Arregiren arabera, ikastolak baliabideak behar ditu eraldaketa pedagogikoko prozesua finkatu ahal izateko. Prozesu hori dagoeneko fruituak ematen ari da, baina espazio eta ikasgelen banaketarako behar berriak sortu ditu.

Gainera, Ikastolak oraindik aurre egin behar dio 2011n Bigarren Hezkuntzako etaparako eraikin berri bat eraikitzearen ondorioz hartutako zorrari. “Bagenekien erabaki horrek zorpetze handia ekarriko zigula”, adierazi du Azkaratek, “baina beharrezkoa zela uste genuen. Beraz, Nafarroa Oinez 2022 honek mailegu horiei aurre egiteko ere balioko digu”.