50 kontzertu eskainiko dira abenduaren 4tik 8ra, Durangoko Azokako Ahotsenean

Zuzenekoak Plateruenan izango dira. Orotara, hamar kontzertu eskainiko dira bertan egunero, bost egunez, goizeko 11:00etatik gaueko 22:00etara arte, doako sarrerarekin.

Aurten ere aniztasuna izango da nagusi Durangoko Azokako Ahotsenea gunean. Askotariko musika estilotako  50 banda igoko dira Plateruenako agertokira: rock, pop, folk, hip-hop, trikitixa, funk, reggatoia, flamenkoa, bakarlariak… Musikari batzuek euren lehenengo diskoa aurkeztuko dute Azokan, eta beste batzuk ibilbide luzeko taldeak izango dira, Durangon behin baino gehiagotan euren lanak aurkeztu dituztenak. Guztiek ordu erdiko tartea izango dute euren lan berria aurkezteko. Zuzeneko guztiak streaming bidez jarraitu ahal izango dira zuzenean, www.durangokoazoka.eus webgunean.

Egunez eguneko egitaraua honakoa izango da:

Abenduak 4: Bulego, Eneritz Furyak, Habia, Serge, Kaserna, Katez, Rolan Garces & Bandatze, Anita Parker, Addar eta Anari.

Abenduak 5: Diabolo Kiwi, Lur Jota, Larrealde Trikitilariak, Kilimak, Skakeitan, Nikotina, Fufu, Kai Nakai, Sueder eta Lotura.

Abenduak 6: Trigger, Jabi Patxon & Kofradia Beltza, Bixente Martinez, Hibai, Iker Martinez eta Zaldi Herrenak, Bengo, McOnak, Etxekalte + Habi, Iheskide eta Jiel.

 Abenduak 7: Ekiñe, Konpost, Esanezin, Willis Drummond, Vinilo Ridin’ Rocket, Hegazkin, Estitxu, Wood Strings, Onki Xin eta Hipnosia.

Abenduak 8: S.A.D., Birkit, Astoturfer, Nahiak Nahi, Liher, Klak!son, Giante, Madeleine, Screamers and Sinners eta Errietan.

Musikaz gain, Durangoko Azokak diziplina askotariko egitaraua izango du 56. edizio honetan: solasaldiak, proiekzioak, arte eszenikoak, umeentzako ikuskizunak, ekitaldiak… Egitarau osoa azaroaren 22an aurkeztuko dute. Azokako egitaraua abenduaren 4tik 8ra izango da, erakusmahaiak Landako Gunean egongo diren egunetan. Online denda, bere aldetik, abenduaren 3tik 7ra egongo da martxan, www.durangokoazoka.eus webgunean.