Jaime Eguarasen ‘Larruazalaren azpian: translazioak eta disonantziak’ erakusketa paratu dute Iruñean

Argazkiek, eskulturek eta Uraren gizona izenburupean maskulinitatearen arketipo eta klixeetan sakontzen duen lau minutuko ikus-entzunezko lan batek osatzen dute erakusketa. Maiatzaren 15era arte egongo da ikusgai Ziudadelako Labean.

Jaime Eguaras Roa artista nafarraren Larruazalaren azpian: translazioak eta disonantziak erakusketa gizonezkoei egozten zaizkien rol soziokulturalen inguruan bost hilabetez lan egin, aztertu eta zalantzan jarri ondoren sortu da. Argazkiek, eskulturek eta Uraren gizona izenburupean maskulinitatearen arketipo eta klixeetan sakontzen duen lau minutuko ikus-entzunezko lan batek osatzen dute erakusketa.

Ziudadelako Labean paratu dute erakusketa eta “gelditasuna” salatzen da gizartean gertatzen ari diren aurrerapenen aurrean, mugimendu feministarekin eta aldaketa bilatzen duten beste gizarte-ekintza batzuekin kontrajarrita. Eguarasek, behintzat, hala deskribatzen du, eta bere larruazala modu metaforikoan jartzen du erakusketa honetan, non bere gorputza biluzten duen, bere esperientzietatik, batzuk traumatikoak, eta oroitzapenetatik artea eginez. Halaber, egungo gizartearen eta berdintasunezko gizarte baterako oinarriak ezartzen dituen hezkuntza-sistemaren ikuspegi kritiko eta batere atseginetik egiten du, klixerik eta estereotiporik gabe.

Lan kritiko horretarako artistak hainbat arte-diziplinatara jo du, argazkigintzatik hasi eta eskulturaraino, ikus-entzunezko ekoizpenetik ere igarota. Diziplina horietan, artista modelo ere bihurtu da, bere burua hainbat egoeratan islatuz, pertsonaia ezberdinak gorpuztuz, autoerretratuak sortzeko asmorik gabe, maskulinitatearen arketipoen irudikapenak baizik. Hala, alde batera uzten du autoerretratuek artista bere horretan islatzeko duten asmoa, erretratatuarekin nahitaez zerikusirik ez duten estereotipoak irudikatzeko.

Rolen miaketa horretan, Eguarasek gertakarien eta lekuen oroitzapenetara jo du, baina baita oroitzapen horien ondorioz sortutako fantasietara ere, errealitatearen eta irudimenezkoaren arteko komunikazioan, eta horrek ideiak adierazteko modu berriak ekarri ditu.

Jaime Eguaras Lizarrakoa da, eta Arte Ederretan graduatua Euskal Herriko Unibertsitatean. Bere obra eta erakusketetan gizartearekiko interesa eta haren portaera azaltzen ditu, gizarte-hezitzaile gisa duen prestakuntzaren ondorioz. Haren sorkuntzek arreta berezia eskaintzen diete maskulinitate-ereduei eta migrazio-politikei, besteak beste.