Irantzu Idoatek irabazi du Euskal Herriko Eskolarteko txapela

Maddi Agirre izan da txapeldunordea Iurretako frontoian jokatu den txapelketan. Unai Iturriaga bertsolari durangarrak jantzi dio garaikurra Idoateri.

Asteburu honetan jokatu da 34. Euskal Herriko Eskolartekoa Iurretan. Bertan, hamabi gazte aritu dira kantuan Idoia Anzorandia gai-jartzailearen esanetara: Aetz Etxart, Beñat Astiz, Daia Harluxet, Danel Herrarte, Eki Mateorena, Haira Aizpurua, Irantzu Idoate, Izaro Bilbao, Jon Mendiluze, June Aiestaran, June Diaz eta Maddi Agirre. Epaile lanetan, berriz, Ainhoa Arregi, Aitor Jimenez, Julen Zelaieta, Lur Renteria eta Maite Sukia izan dira.

Lehen zatia amaituta, Haira Aizpurua, Irantzu Idoate, Jon Mendiluze, June Aiestaran, June Diaz eta Maddi Agirre sailkatu dira bigarren zatirako; azkenik, Irantzu Idoatek lortu du 2022ko Euskal Herriko Eskolarteko txapela eta Maddi Agirre izan da txapeldunorde. Unai Iturriaga bertsolari durangarrak jantzi dio garaikurra txapeldunari.

Urte hasieran ekin zitzaion 34. Eskolartekoari eta ekainera arte bere bidea egin du lurraldeetan. Ikastolen Elkarteak eta Bertsozale Elkarteak antolatzen dute gazteen bat-bateko bertsolari txapelketa. “14 eta 18 urte bitarteko gazteei jendaurrean bertsotan aritzeko plaza eskaintzea eta zaletasuna bultzatzea du helburu Eskolartekoak. Gainera, tokian tokiko ezaugarriak kontuan hartuta, bestelako ekintzak ere egiten dira bat-bateko txapelketaz gain: idatzizko txapelketa edota adin txikiagoentzako lehiarik gabeko topaketa, adibidez”, azaldu dute.