Tolosako Topic Museoa Cal Teatre konpainiaren sormen egoitza bilakatu da

Prestatzen ari diren antzezlanari Mentira cochina izena jarri diote eta haurrentzako egiaren kontzeptuari buruzko hausnarketa proposatzen du.

Cal Teatre konpainia ikuskizun berriaren egitura osoa prestatzen ari da aste honetan, Topic Museoan. Lana dagoeneko idatzita dutela diote eta Tolosako Museoan dramaturgia-maila landu eta itxi nahi dutela iragarri dute. Lantaldeak gaineratu duenez, “erabaki guztiak hartu behar ditugu eszenografiaren eta txotxongiloen eraikuntzaren arloan.

Antzezlanari Mentira cochina izena jarri diote eta haurrentzako egiaren kontzeptuari buruzko hausnarketa proposatzen du, baina haurrei esaten zaien “ezin da gezurrik esan” edo “gezurrak esatea gaizki dago” topikoan erori gabe. Cal Teatre taldeko Jordi Font eta Carlos Gallardo aktoreek diotenez, “hain polarizatuak diren egia eta gezur kontzeptuak ez die haurrei ikusten uzten gris-eskala handia dagoela tartean, eta horiek aurkitzeko modu bakarra zalantza sortzea dela”.

Gai horri buruz hitz egiteko, Kataluniako Konpainia Hiru txerritxoen ipuinaz baliatuko da, eta etxe bat gezurrak eraikitzeko erreferente gisa erabiliko du, metafora barregarri eta dibertigarri bat bezala, ipuin klasikoaren bertsio aske batekin. “Dramaturgia eraikitze-joko bat bezala ikusten dugu, kutsu surrealista duen gezur baten arkitektura, non hiru txerritxoek, sare sozialek eta influencerrek elkarri eskua ematen dioten”.

Bai Font eta bai Gallardo ohituta daude haurrak beren istorioetara modu naturalean eta bikoiztasunik gabe hurbiltzen. Halaxe egin zuten aurreko lanean ere, Aulki-jolasa, normaltasun osoz nola aurre egiten dieten kontzeptuei; horregatik, Mentira cochina ikuskizunean, hizkuntza propioen konbinazioa lantzen dute, esperimentazioan sakonduz eta, aldi berean, hizkuntza berritzaileak bilatuz.

Obra Kanariar Uharteetan estreinatuko da, Tolosako Titirijai jaialdia baino astebete lehenago. Estreinaldiaren ondoren Titirijai jaialdian ikus ahal izango dugu. Topiceko egonaldi horren ondoren, beste sormen-egoitza batera joango dira, Arenys de Mar-en (Bartzelona), eta bertan alderdi artistikoa eta teknikoa landuko dute. “Tolosara etorri aurretik Alella de Mar-en eta Teatre Nu etxean egin ditugu sormen-egoitzak. Artistontzat sormen-egoitzak oso garrantzitsuak dira, ikastaro trinkoak baitira, zuk obrarekin izan dezakezun inplikazio-mailagatik eta edozein interferentziatatik urrun”.