[BIDEOA] Zea Mays taldeak pandemia garaian sortutako ‘Adore, Kemena, Kuraia’ aurkeztu du

Doctor Deseo taldearen Corazón de tango kantaren bertsioa da diskoan entzun daitekeen piezetako bat.

Adore Kemena Kuraia disko berri honetan biltzen diren hamar abesti berri hauetarako, Zea Mays taldeak ekoizle adituen laguntza izan du: Paco Loco, Dave M. Allen, Ricky Falkner, Santi Garcia eta Aritz Aranburu, besteak beste. “Denek esperientzia eta jakintza gehitu diote diskoari dudarik gabe, baina, hala ere, kanpoko euskarri edo estudioen izenak asko aldatu arren, disko osoak magikoki Piti, Aiora, Ruben eta Asierren soinua du”, adierazi dute Promomusikako kideek. “97. urtetik hona elkarrekin ari diren lau izen, eta miresmen sakon, errespetu eta maitasunarekin idazten ditugunak”.

Laukoak bazuen jada sintetizadoreak erabiltzeko joera bat. “Atera (2019) diskoa 80. hamarkadako sonoritateaz bustitzen bazen nolabait, oraingo Adore, Kemena, Kuraia lanean sinteak ezinbestekoak dira jantziaren ehunduran eta osagarrietan. Txipek eta emulazioek diskoari matizak ematen dizkiote, eta armonikoki bizi dira taldeak duen rockaren zentzuarekin. Abesti multzoak testuengatik, bira berriengatik, inspiraziotik eta musikaltasunagatik liluratzen du”.

Doctor Deseo taldearen Corazón de tango kantaren bertsioa da diskoan entzun daitekeen piezetako bat. “Bilboko laukoteak hit ahaztezin hau berreskuratu eta berritu du lan berrirako. Bestetik, Rozalenekin egindako kolaborazio gozoa ere aipatu beharra dago: Ez naiz ni, balada, sinteak, gitarra garbiak, espazioak…eta argi asko”.