Martin Etxeberria idazleak ‘Kangaroo’ bosgarren poema liburua kaleratu du

Gauza asko daude munduan eta bizitzan idazle zarauztarrak ulertzen ez dituenak, bere burua ere ez duela ulertzen aitortu du, eta, horregatik, liburua ahalegin bat da bere erosotasun eremutik atertzeko eta barruan dituen alderdi ilun, itzal eta minei gorputz eta haragi bat emateko.

Martin Etxeberria idazle zarauztarrak Kangaroo izeneko olerki liburua kaleratu du Elkar argitaletxearen eskutik. Honetan, ulertzen ez duenaz mintzo da, “gauza asko daude munduan eta bizitzan ulertzen ez ditudanak, ni neu barne, eta esango nuke liburua ahalegin bat dela nire erosotasun eremutik ateratzeko eta barruan ditudan alderdi ilun, itzal eta minei gorputz eta haragi bat emateko. Pauso bat da horiek ulertzen saiatzeko edo onartzeko”, adierazi du.

Liburuaren sarreran egileak argitzen duen bezala, “Cook kapitaina Australiara iritsi zenean, bere espedizioko botanikoak, jauzi handiak egiten zituen piztia seinalatuz, haren izenaz galdetu omen zien bertakoei, eta hauek Kan ghu ru erantzun. Kangaroo bataiatu eta hala ezagutzen dugu geroztik delako animalia hori, nahiz Kan ghu ru hitzek Ez dizut ulertzen esan nahi duten hangoen hizkuntzan. Horregatik aukeratu du idazleak bere bosgarren poema liburuari Kangaroo izena jartzea.

Pasadizo umeretsuarekin abiatzen den arren poema ilunak dira nagusi Etxebarriaren lan berrian. Egilearen ustez, denok dugu zerbait iluna edo konpondu beharrekoa.

Liburuak eguneroko bizitza eta surrealismoa uztartzen ditu, hitz soilekin egindako esaldi berri eta irudi harrigarrien bilaketa, begi bat misterioan eta bestea perbertsitate neurtu batean, esanezinezkoa harrapatzeko ahaleginean beti.