Iruñeko bederatzi ikastetxe publikok ‘Bertsolaritza irakaskuntzan’ programa abiatuko dute

Programaren xedea da Nafarroako ahozko kultur ondarea den bertsolaritzaren transmisioa bultzatzea; ahozkotasuna lantzea eta testuinguru ez-formaletan hizkuntza modu ludikoan erabiltzea, eta ikasleek gizarte-trebetasunak, pertsonalak, komunikaziokoak eta hizkuntza-trebetasunak garatzea.

Iruñeko D ereduko bederatzi ikastetxe publikok Bertsolaritza irakaskuntzan programa eskainiko dute datorren ikasturtean. Hala, 5. eta 6. mailako ikasleek bertsolaritzaren oinarrizko printzipioak ezagutuko dituzte Iruñeko Udalak antolatutako eta Nafarroako Bertsozale Elkarteak kudeatutako programaren bitartez.

Programaren xedea da Nafarroako ahozko kultur ondarea den bertsolaritzaren transmisioa bultzatzea; ahozkotasuna lantzea eta testuinguru ez-formaletan hizkuntza modu ludikoan erabiltzea, eta ikasleek gizarte-trebetasunak, pertsonalak, komunikaziokoak eta hizkuntza-trebetasunak garatzea. Azaldu dutenez, “planteatutako saioak bertsolaritzaren oinarrizko ezagutzak ikastera bideratuta daude (historia, doinuak, metrikak, errimak…), teknikaren irakaskuntza azpimarratuz, jolasen eta ariketen bidez. Testuingurua ludikoa izaten da beti, eta hizkuntzaren erabileran sakontzen da, hizkuntza- eta komunikazio-gaitasunak ardatz harturik”.

Programa astean behin garatuko da, irakastorduetan, denera 15 ordu osatu arte. Programan parte hartuko duten ikastetxeak honakoak dira: Hegoalde Ikastola, San Frantzisko, Bernat Etxepare, Patxi Larrainzar, Elorri, Mendigoiti, Amaiur Ikastola, Sanduzelai eta Buztintxuri. Guztira, 570 ikastordu eginen dituzte.

Oinarria, 2008an argitaratutako eta Nafarroako Bertsozale Elkarteko irakasleek idatzitako Bertsolaritzaren curriculuma lana da. “Bertsolaritza lau alderdi ardatz hartuta lantzen da: hizkuntza, kultura, musika eta trebetasun pertsonalak eta sozialak”. Material didaktikoa sekuentziatan antolatuta dago, eta horietako bakoitza hiru formatutan eskuratu ahal izango da: liburua, karta-jokoak eta plataforma digitala (www.bertsoikasgela.eus).