Haize-arrosa taldeak ‘Ez dogu zor ezer’ kanta eta bideoklipa kaleratu ditu

Abestiak gizarteak edertasunaren inguruan sortu dituen kanonak kritikatzea du helburua.

Berrizen sortu zen iaz Eneritz Gorritxategi, Edurtzeta Ania, Markos Murillo, David Vallejo eta Peio Agirre musikariek sortutako Haize-arrosa izeneko taldea. Boskote berri honen musika koloreak askotarikoak eta pluralak dira, baina ez da ari haize-orratzak markatzen duenaren arabera. Ongi hausnartutako erritmoak landu dituztela nabarmendu dute, izan ere, eskarmentu handiko musikariez osatuta dago talde berria, 1990eko hamarkadako Ene Bada taldean aritutakoak gehien bat, eta askatasunetik ateratako erritmoak landu dituzte. Folk-rock, Irish-folk-rock, pop-rock, country-rock, elektro-pop-triki, world-fusion, balada, flamenkoa, mex, fandangoa, a capella edota ambient dira entzun daitezkeen doinuetako batzuk.

Joan den martxoan Tortolaraino izeneko aurkezpen kanta plazaratu zuten eta oraingoan bigarrenarekin datoz: Ez dogu zor ezer. “Gizarteak edertasunaren inguruan sortu dituen kanonak kritikatzea du helburua abestiak, gorputz normatiboetatik harago bizitza zoragarriak daudelako, eta hori aldarrikatzea eta zaintzea bizitza bera defendatzea da”, azaldu du boskoteak.

Gorritxategi eta Aniarekin batera, Francis Diazen (Doctor Deseo) ahotsa ere entzun dezakegu kanta berrian. Letra, berriz, Onintza Enbeita bertsolariak idatzi du, eta Aitor Ariñok grabatu du. Bideoa Maria Redondok zuzendu du, eta Itziar Ituño, Juanjo Otero, Marina Ostolaza eta Uxue Santa Eufemiaren lanaz gozatzeko aukera ematen digu.