Aitor Bengoetxea ‘Bengo’ musikariak ‘Ez da betiko’ bere lan berria izango denaren bigarren abestia kaleratu du

Julen Adurizek (Ergobia) eta Yeray Lizarazuk ekoiztu dute Ez da betiko, Oiartzungo lokal txiki batean.

Aitor Bengoetxea Bengo musikari oiartzuarrak plataforma digitaletan argitaratu du Ez da betiko, bere lan berria izango denaren bigarren kanta. Aurreko guztiarekin hausten du abesti berriak eta, Beste Behin aurrerapen kantarekin batera, artistarentzako etapa helduago eta pertsonalago baten hasiera da.

Julen Aduriz produktore gaztearekin batera eta, oraingo honetan, Yeray Lizarazurekin lankidetzan, egoera zaila bizi izaten ari den pertsona baten istorioa transmititzen saiatzen da Bengo. Denbora luzez jasaten ari den zurrunbilo emozional baten ondorio da protagonistak orain duen egoera, eta badaki, lehenago edo beranduago, aurre egin beharko diola zurrunbilo horri.

Abestiaren generoari dagokionez, “hiri-generoaren” barruan sartzen da eta, hitzek egoera zail bat islatzen duten arren, nolabaiteko in crescendo bat da abestia: gitarra batzuekin eta erritmo apalarekin hasten da eta, pixkanaka, irekiz eta indarra hartuz doa, errepikan nabarmentzen amaitzen duen arte. Horrela, hitzak eta erritmoa batera doaz, guztiarekin hautsi nahi izatearen sentsazio hori sortzea lortzeko, errepika frenetiko batekin amaituz.

Adurizek (Ergobia) eta Lizarazuk ekoiztu dute abestia, Oiartzungo lokal txiki batean.  Eñaut Gaztañagak nahastu eta masterizatu du “Ez da betiko”, Zestoako Gaztain Estudioan. Bideoklipa, berriz, Rita Gratacosek (Bartzelona) zuzendu eta editatu du, eta Orion eta Oiartzunen grabatu dute.