Baztandarren Biltzarrak Elizondoko kaleak hartuko ditu igandean

Orga apainduak izaten da bestaren muina, hauetan herri bakoitzeko kezkak eta aldarrikapenak udalaren, gobernuaren eta herritarren aitzinean agertzeko; herri bakoitzeko xoko eta herritarren izana eta izena azaltzeko erabiltzen baitira.

“Karrozak eta musika”, “baserritarrez beztitzen gara”, “besta, besta eta besta”, “baztandar guzien besta”, “aitatxok karroza egiten du lagunekin”… horixe erantzuten dute bailarako haurrek Baztandarren Biltzarra zer den galdetuta. Bailarako herritarren arteko senidetasun jai handia da Baztandarren Biltzarra. Udan egiten da, Santiago egunaren aurreko igandean, aurten, beraz, hilaren 21ean, egingo dute Elizondon.

Orga apainduak izaten da bestaren muina, hauetan herri bakoitzeko kezkak eta aldarrikapenak udalaren, gobernuaren eta herritarren aitzinean agertzeko; herri bakoitzeko xoko eta herritarren izana eta izena azaltzeko erabiltzen baitira.

Iragan urteetan bezala, aurten ere, orgen desfilean Euskal Herriko zazpi probintzietako musikari eta dantzariak gonbidatzeko ahalegin berezia egin da. Elizondoko Merkatu plazan egingo den bazkariari dagokionean, Baztandarren biltzarrak bertako nekazari eta abeltzainek ekoitzitako produktuen aldeko apustua egiten jarraitzen du.

Arratsaldean, berriz, jaiak musika emanaldiekin, antzerki ikuskizunekin eta kirol-lehiekin jarraituko du.

Horrez gain, Elizondoko kaleetan zehar azoka egongo da egun osoan, janarien, tokiko produktuen eta eskulanen salmahaiekin.

Aurtengo kartela

Saioa Ligos Elizondoko gazteak egin du edizio honetako kartela, eta honetan, lau pertsona ageri dira: bi jantzi tradizionalez jantziak eta beste biak garai eta estilo desberdineko jantziekin. Irudi horrekin, egileak norberaren nortasuna irudikatzeko eta adierazteko askatasuna aldarrikatu nahi izan du, epaitua eta diskriminatua izateko beldurrik gabe.