Getxoko Emakume Sortzaileen Topaketa antolatu dute azaroaren 9an, Algortako Muxikebarrin

Best Getxok, Getxoko Emakume Sortzaileen Topaketak, aukera ematen digu udalerriko emakume sortzaileen unibertsora hurbiltzeko. Izaro Ieregi, Olatz Ganboa, Mariasun Yanguas, Maite Mentxaka, Itxaso Diaz eta Itxaso Paya dira aurtengo artista gonbidatuak.

Zelako Kultur Ideiak kooperatibak Best Getxo, Getxoko Emakume Sortzaileen Topaketa, antolatu du datorren azaroaren 9rako, Algortako Muxikebarrin. Antolatzaileen esanetan, ekimenaren helburuak dira “kulturaren sektorean genero berdintasuna sustatzea eta Getxoko emakume artista eta sortzaileen talentua eta sormena agerian jartzea.

Hala, arte diziplina guztietako emakume sortzaileak bilduko dira topaketa honetan, “elkar ezagutu, esperientziak eta ezagutzak elkarbanatu eta euren arteko sinergiak ahalbidetzeko asmoz”. Oraingo honetarako gonbidatuak honakoak dira: Izaro Ieregi artista bisuala, Olatz Ganboa aktorea, Mariasun Yanguas zuzendari korala, Maite Mentxaka diseinatzailea, Itxaso Diaz zinegile eta LAN jaialdiko zuzendaria eta Itxaso Paya aktore eta sortzailea.

Bestalde, Jone Gonzalez diseinatzaile algortarra izan da Getxo Best topaketaren kartela eta komunikazio euskarrien  egilea. Getxoko hiru emakume sortzaileren irudiarekin osatutako seriea egin du Gonzalezek: Irati Elorrieta idazlea; Garbi Losada antzerki zuzendari, idazle eta aktorea, eta Ana Bejarano Mocedades musika taldeko abeslari-ohia.

Topaketarako sarrera librea izango da edukiera bete arte eta haurrentzako zaintza zerbitzua eta aldibereko itzulpen zerbitzua eskuragarri egongo dira.