Marta Funesek jaso du 2025eko Carmen Adarraga Saria

Eskola-kirola sustatzen egin duen ibilbide nabarmena eta kirolaren esparruan berdintasunarekin duen konpromisoa aintzatesteko eman dio saria Gipuzkoako aldundiak. Martxoaren 6an izango da sari-emate ekitaldia, Kirol Etxean.

2025eko Carmen Adarraga Sariaren epaimahaiak Marta Funesek egindako “lan aparta” nabarmendu du, “bizitza osoa eman baitu eskola-kirola sustatzen eta kirolaren bidez gizarteratzea lantzen”. Aintzatespena jaso du “kirolean genero-berdintasuna sustatzeko eta hainbat ingurune sozial eta ekonomikotako gazteentzako aukerak sortzeko egindako lan nekaezinagatik”. Bere ibilbidean zehar, Funes “funtsezko figura izan da” Gipuzkoan emakumeen kirola garatzeko, eta “konpromiso eredugarria erakutsi du kirola giz

Goizane Alvarez diputatuak nabarmendu duenez, “Funesek ezin hobeto gorpuzten ditu Carmen Adarraga Sariak aintzatetsi nahi dituen balioak: konpromisoa, ahalegina eta kirola berdintasuna lortzeko tresna eraldatzaile gisa. Bere ibilbidea adibide bat da, erakusten duena dedikazioz eta grinaz posiblea dela oztopoak gainditzea eta guztiontzako aukerak sortzea”.

Aintzatespen honekin, Carmen Adarraga Saria jaso duten emakumeen zerrendan sartu da Funes. Zerrenda horretan daude, besteak beste, Coro Fuentes, Mari Ayestaran, Las Raquetistas, Nieves Alza, Arantza del Puerto, Carmen Diez Mintegui, Azu Muguruza, Garbiñe Etxeberria eta Tati Garmendia. Horiek guztiek mugimendu eta aldaketa esanguratsuak gidatu dituzte kirolaren historian, berdintasuna sustatuz, eta erreferente bihurtu dira etorkizuneko belaunaldientzat.