Esanezin, Esti Markez eta Maite Ruiz de Erentxun musikari gazteek bat egingo dute Bozak ikuskizunean

Bilboko Loraldia Festibalaren ikuskizun hau hilaren 29an izango da arratsaldeko 19:00etan, Bira Kulturgunean.

Hiru emakume, hiru ahots, hiru estilo desberdin: Esanezin, Esti Markez eta Maite Ruiz de Erentxun elkartuko dira Bira Kulturgunean, gazte sormenaren indarra eta berrikuntza erakusteko.

Gaurko gazte sormenaren hiru ahotsen topaketa eskainiko du Loraldia Festibalak martxoaren 29an, Bilboko Bira Kulturgunean. Izan ere, Loraldiak gazte sormenaren aldeko apustua egiten jarraitzen du, eta oraingoan hiru emakume talentudun izango ditu eszenatokian: Esanezin, Esti Markez eta Maite Ruiz de Erentxun, “hiru estilo desberdin eta hiru musika begirada”, antolatzaileen esanetan. “Hiru sortzaile, hiru kantu, eta hiru ahots, guztiak beren estilo propioarekin, eta guztiak etorkizuneko musika eskaintzeko prest”.

Esti Markezi dagokionez, euskal kantautorea da, txikitatik izan du musika grina, eta horri jarraituz, bere ibilbidea profesionalizatu du. Bi disko plazaratu ditu eta bere estiloak klasiko eta modernoen arteko oreka erakusten du.

Esanezin, bere aldetik, Ianire Aranzabe gaztearen proiektua da, eta 2019ko udan hasi zen bere ibilbidea Oriol Flores katalandarrarekin batera. “Bi disko plazaratu ditu eta bere freskotasunak eta estilo berritzaileak sorpresa handia eman dute”, adierazi du antolakuntzak.

Azkenik, Maite Ruiz de Erentxun dugu, Bartzelonako musika goi-ikasketak amaitu ondoren, jazz munduan murgildu zen. “Akordeoia eskuan, jazzaren eta euskal soinuaren arteko fusioa eskaintzen du, eta bere bide originala egiten ari da”.

Ikuskizuna doakoa izango da, baina sarrerak aldez aurretik eskuratu beharko dira hemen.