Zaldiko Maldiko kultur elkarteak jarriko dio txapela Nafarroako bertsolari txapeldunari

Nafarroako Bertsozale Elkarteak “euskaldunentzat arnasgune izateagatik, euskal kulturarekin eta bertsolaritzarekin duten harreman estuagatik eta bertsolaritza sustatzeko egindako ekinbide guztiagatik” eskerrak eman nahi dizkie Zaldiko Maldiko elkarteko kideei.

Zaldiko Maldiko Kultur Elkartearen izenean, Sergio Barandiaranek jarriko dio txapela Nafarroako bertsolari txapeldunari. Nafarroako bertsozale Elkarteak adierazi duenez, “txapela jantziko duena izaten da finaleko protagonistetako bat izaten da. Eskertza modukoa da txapel emailea izatea, omenaldia eta aitortza. Euskaldunentzat arnasgune izateagatik, euskal kulturarekin eta bertsolaritzarekin duten harreman estuagatik eta bertsolaritza sustatzeko egindako ekinbide guztiengatik eskerrak eman nahi dizkiegu Zaldiko Maldiko elkarteko kideei”.

Bertsozaleren arabera, “handia da Zaldiko Maldikok Iruñean egin eta egiten duen lana”. Iruñeko Euskaldunentzako arnasgune izateko sortu zen elkartea 1981. urtean. Euskal kulturarekin eta bertsolaritzarekin harreman estua izan du ordutik. Elkarte sortu eta urte betera, 1982an, antolatu zuten lehenengo bertso eskola Lontxo Aburuzaren gidaritzapean.

Ordutik hona, bertsolaritzak beti izan du presentzia Zaldiko Maldikon, izan bertso eskola, izan ekimen modura, izan bertsolarien entrenamendurako espazio bezala ere. Erreferentziazko gunea da Iruñeko euskaldunontzat, eta hala izan da ere Bertsozale Elkartearentzat: “bertan egin ditugu Bardoetako hainbat saio, haur eta gazteen eskolarteko saioak edota, aurten adibidez, Señora Sariketako finala”.